ᱚᱠᱟ ᱥᱮᱫᱤᱧ ᱵᱚᱞᱚ ᱦᱮᱡ ᱮᱱ
ᱱᱚᱣᱟ ᱫᱚ ᱢᱟᱱᱟ ᱟᱠᱟᱱ ᱴᱷᱟᱶ
ᱚᱠᱟᱨᱮᱜᱮ ᱥᱩᱞᱩᱠ ᱵᱟᱹᱱᱩᱜ
ᱧᱩ ᱵᱩᱞ ᱟᱠᱟᱱ ᱟᱯᱟ ᱦᱚᱯᱚᱱ
ᱵᱟᱹᱦᱩ ᱡᱟᱶᱟᱭ ᱱᱮᱭᱟᱣ
ᱢᱟᱹᱱᱢᱤ ᱢᱟᱹᱱᱢᱤ ᱛᱩᱯᱩᱫ
ᱞᱮᱛᱟᱲ ᱡᱚᱲᱟᱣ ᱟᱠᱟᱱ ᱾
ᱚᱠᱟ ᱥᱮᱫ ᱤᱧ ᱵᱚᱞᱚ ᱦᱮᱡ ᱮᱱ
ᱫᱷᱚᱨᱚᱢ ᱵᱚᱰᱮ ᱟᱠᱟᱱ
ᱡᱟᱹᱛᱤ ᱴᱚᱲᱚ ᱢᱚᱲᱚᱜ
ᱫᱷᱚᱨᱚᱢ ᱫᱷᱚᱨᱢ ᱪᱮᱛᱟᱱᱨᱮ
ᱵᱟᱹᱭᱨᱤ ᱠᱚ ᱥᱟᱡᱟᱣ ᱟᱠᱟᱱᱟ
ᱢᱟᱭᱟᱢ ᱞᱤᱸᱜᱤᱱ ᱠᱟᱱ
ᱜᱚᱴᱟ ᱜᱟᱰᱟ ᱢᱩᱰᱩ ᱞᱤᱸᱜᱤᱱ ᱞᱮᱠᱟ ᱾
ᱚᱠᱟ ᱥᱮᱫ ᱤᱧ ᱵᱚᱞᱚ ᱦᱮᱡ ᱮᱱ
ᱢᱟᱱᱹᱱᱢᱤ ᱭᱟᱜ ᱠᱤᱨᱤᱧ ᱟᱹᱠᱷᱨᱤᱧ
ᱢᱟᱹᱱᱢᱤᱭᱟᱜ ᱦᱟᱴ ᱥᱮ ᱪᱮᱫ
ᱢᱟᱹᱱᱢᱤᱭᱟᱜ ᱡᱤᱣᱤ ᱡᱟᱹᱛᱤ
ᱫᱩᱞᱟᱹᱲ ᱥᱤᱯᱤᱵᱤᱞ ᱵᱮᱵᱷᱟᱨ
ᱠᱤᱨᱤᱧ ᱟᱹᱠᱷᱨᱤᱧ ᱪᱟᱵᱟ ᱟᱠᱟᱱᱟ
ᱥᱟᱨᱮᱡ ᱟᱠᱟᱱᱟ ᱮᱠᱷᱮᱱ
ᱦᱤᱨᱠᱟᱹ ᱮᱫᱨᱚ ᱟᱹᱲᱤᱥ ᱾
ᱚᱠᱟ ᱥᱮᱫ ᱤᱧ ᱵᱚᱞᱚ ᱦᱮᱡ ᱮᱱ
ᱱᱚᱸᱰᱮ ᱢᱟ ᱟᱫ ᱪᱟᱵᱟ ᱟᱠᱟᱱᱟ
ᱢᱟᱹᱱᱢᱤᱭᱟᱜ ᱩᱱᱩᱨᱩᱢ
ᱦᱤᱲᱤᱧ ᱟᱠᱟᱱᱟ
ᱟᱹᱜᱤᱞ ᱦᱟᱯᱲᱟᱢ ᱧᱩᱛᱩᱢ
ᱠᱷᱮᱨᱣᱟᱲ ᱦᱚᱯᱚᱱ ᱱᱟᱜᱟᱢ
ᱥᱮᱨᱣᱟ ᱟᱨ ᱥᱚᱥᱱᱚᱜ ᱾
ᱦᱟᱯᱮ ᱤᱧᱫᱩᱧ ᱪᱟᱞᱟᱜ ᱠᱟᱱᱟ
ᱟᱞᱚᱯᱮ ᱯᱟᱸᱡᱟ ᱵᱟᱲᱟᱭᱤᱧ
ᱞᱩᱜᱩᱵᱩᱨᱩᱜᱷᱟᱱᱴᱟᱵᱟᱹᱲᱤ
ᱵᱟᱝᱠᱷᱟᱱ ᱟᱹᱛᱩ ᱡᱟᱦᱮᱨᱜᱟᱲ
ᱯᱟᱱᱛᱮ ᱟᱹᱜᱩᱠᱚᱣᱟᱧ ᱢᱟᱹᱱᱢᱤ
ᱥᱟᱹᱨᱤ ᱥᱟᱨᱡᱚᱢ ᱵᱩᱴᱟᱹᱨᱮ
ᱢᱟᱱᱹᱢᱤ ᱭᱟᱜ ᱡᱟᱹᱛᱤ ᱫᱷᱚᱨᱚᱢ
ᱥᱤᱯᱤᱵᱤᱞ ᱫᱩᱞᱟᱹᱟ ᱨᱮᱦᱟᱜ ᱦᱚᱨ ᱾᱾
Comments
Post a Comment